Pagpadali sa restoration sa Cugman NHS gisugyot ni Moreno

NAGLAUM si Konsehal Imee Moreno nga mahuman ug mapadali ang restoration sa Cugman National High School kay nakita sa konsehal nga anaa nay mga magtutudlo ug mga tinun-an nga nagtungha diha sa maong tunghaan taliwala sa mga kakulangon.

Kini ang gibutyag ni Moreno atol sa miaging tigom sa Komite sa Edukasyon ni Konsehal Suzette Magtajas-Daba human gituki ang iyang taho kabahin sa update sa maong tunghaan.

Si Dr. Alice Anghay mibutyag nga ang Local School Board migahin og P31 milyones alang sa pagkompleto sa maong tunghaan nga naglangkob sa P5 milyones alang sa pagkutay sa elekrisidad, P5 milyones alang sa koneksyon sa tubig, P4.5 milyones alang sa slope protection ug pagkoral, P5.6 milyones alang sa mga bangko ug P7.9 milyones alang sa pagpalit o pagpuli sa nangawala nga mga gamit sama kable sa korente, toilet bowls, jalousie ug uban pa.

Si Konsehal Daba mibutyag nga gipaningkamotan usab sa kagamhanan ubos ni Mayor Klarex Uy uban sa pag-abag sa Department of Education (DepEd) ug mga hintungdang buhatan sa City Hall nga maturn-over ang maong tunghaan sa Enero 2025 aron hingpit na kining mapahimuslan kay dako kini nga tabang sa mga magtudtudlo paghatag og de kalidad nga edukasyon ngadto sa mga tinun-an.

Niini, si Konsehal Moreno kusganong misugyot nga mapadali ang maong restoration kay nagtoo ang konsehal nga mas modaghan pa ang enrollees sa maong tunghaan kon matul-id na ang mga facilidad niini.