Pagpa-ngandam sa budget sa brgy alang sa tuig 2022 gipadumdom

GIPA-HINUMDOMAN ni Konsehal Roger Abaday, chairman sakomitesa senior citizen, ang tanang mga barangay chairman sa syudad nga preparahon na ang ilang annual budget alang sa tuig 2022 tungod kay nagkado-ol na ang gitagal nga pagsubmite niini.

Kini ang panawagan ni Abaday sa tanang mga kapitanes sa dakbayan kini human niya namatikdan nga daghan pa kanila ang wala pa naka-somite.

Sa sesyon ni-adtong Lunes nga gidumala ni Bise Mayor Kikang Uy, gibutyag ni Abaday nga nabalaka siya kun unsa-on sa mga kapitanes pagpadagan ang ilang barangay kun wala kini pundo.

Gipasabot sa konsehal nga kinahanglan nga dili malangan ang pagsumite sa ilang annual budget aron dili ma-abtan sa gitagal nga petsa tungod kay subay sa gabayan nga gipatuman sa Joint Circular no.93-2 sa Department of Budget and Management (DBM) ug sa Commision on Audit (COA), nahilatid nga kadtong mga punong barangay nga pakyas sa pagsumite sa ilang budget ang mag-atubang sa kasong criminal ug administratibo subay sa local code.

Nunot niini, subling gipahinumduman ni Konsehal Abaday ang mga kapitanes sa syudad nga dalion ang pagproseso sa mga gikinahanlang rekisitos sa ilang annual budget aron dili malangan ang pagsomite niini.