Pagmugna sa Oro Flood Advisory Council gilaraw

ANGAYAN nga mamugna ang usa ka flood advisory council sa tinguha nga masolosyonan ang problema sa pagbaha dinhi sa dakbayan.

Mao kini ang gihingusgan ni Bise Mayor Bebot Rodriguez sa iyang pagduso sa sugyot ordinansa nga magmugna sa Cagayan de Oro Flood Advisory Council diin gihan-ay ang mga tahas ug komposisyon sa hunta.

Gibutyag sa bise mayor nga sa tuig 2016 ug 2019 gipahigayon ang pagtuon sa pagpasiugda sa Xavier University –Ateneo de Cagayan diin nasuta nga usa sa nag-unang problema sa dakbayan sa natad sa imprastraktura mao ang mga drainage ug kanal.

Unom ka tuig na ang nilabay human sa maong pagtuon apan nagpabilin gihapon ang problema ug walay gipahigayong mga lakang aron mapalambo ang drainage system sa syudad. Kini nakaapekto og dako sa kinabuhi sa katawhan, pasabot ni Bise Mayor Bebot.

Niini, iyang gisugyot ang pagmugna sa hunta nga langkoban sa mayor isip chairperson, DPWH regional director isip co-chairperson, bise mayor isip vice-chairperson ug chairman sa komite sa public works sa konseho, city engineer, city planning and development officer, hepe sa City Housing and urban Development Department(CHUDD), hepe sa City Disaster Risk Reduction Management Department (CDRRMD),city building official, city administrator, district engineer, representante sa Philippine Institute of Engineers ug representante sa usa ka unibersidad nga nagtanyag ug kursong civil engineering isip mga sakop.

Sa sugyot sa bise mayor usa sa tahas sa maong advisory mao ang pag-umol og mga palisiya alang sa epektibong pagdumala sa drainage system sa syudad ug pagmugna sa mga palisiya nga maminusan ang kadaut dala sa mga pagbaha dinhi sa syudad. (SP/JNortiza)