Pagmugna sa Oro Employment Reform Program gisugyot

SI Konsehal Girlie Balaba, chairman sa komite sa labor and employment, naninguha nga mapalapdan pa ang serbisyo sa dakbayan dinha sa paghatag og patas nga kahigayonan sa katawhan sa ilang pagpangempleyo.

Kini human giduso sa konsehal ang sugyot ordinansa nga magmugna sa Cagayan de Oro City Employment Reform Program of 2022.

Tumong sa maong sugyot nga masagop ang palisiya nga magmugna sa mga programa alang sa mamumuo nga komprehensibo, community-based, industry focused ug people-oriented.

Gitinguha usab niini nga matunol ang patas nga kahigayonan alang sa tanan nga gitumbok nga magdala og kaarangan sa kalidad sa kinabuhi pinaagi sa pagpalig-on ug pagpalapad sa kasamtangang employment facilitation mechanisms.

Niini, gisugyot ang pagmugna sa Barangay Employment Assistance Desk nga maoy makigtambayayong sa gobyerno lokal aron epektibo ug daling mapaabot sa katawhan ang kahigayonan sa pagpanarbaho.

Dako ang paglaum ni Balaba nga pinaagi sa maong sugyot balaodnon matubag ang mga kaso sa unemployment dinhi sa dakbayan. (SP/JNortiza)