Pagmugna sa human rights action board padayong tun-an

GIKINAHANGLAN pa ang dugang pagtuon sa sugyot pagmugna og City Human Rights Action Board (CHRAB) sa dakbayan sa Cagayan de Oro.

Kini human nakuha ang mga panahom sa mga hintungdang dinapit atol sa milabayng tigom sa komite sa sports & youth development ni konsehal John Michael Seno agig reaskyon sa kabalaka nga anaay duplikasyon sa mga implementasyon sa programa.

Ang sugyot ordinansa alang sa maong katuyuan giduso ni Ashel Louisse Mulet, tinun-an sa Liceo de Cagayan University, sa tinguha nga mapalapdan ang programa pagproteher sa tawhanong katungod ilabina sa kabatan-onan.

Niini, gilantaw nga mapasabot, makarekomendar ug mapanday ang mga palisiya kabahin sa paghatag og hustisya ug mahingusgan ang tabang serbisyo legal pinaagi sa pagmugna og linkages/referral system diha sa komunidad.

Niini, gimugna ang Technical Working Group (TWG) nga pangulohan sa representante sa buhatan sa City Legal uban sa Armed Forces of the Philippines (AFP) isip co-chair.

Gitudlo nga maglangkob sa pundok mao ang representante sa Commission on Human Rights (CHR), Department of Education (DepEd), City Information Office (CIO), Office of the Community Affairs (OCA), Oro Youth Development Office (OYDO) ug ubang stakeholders kansang tahas mao ang pagpahigayon sa makuting pagtoon sa maong sugyot ordinansa.