Pagmugna og TWG maghan-ay sa mga palisiya alang sa mga telcos gisugyot

Hiniusang giuyunan sa komite sa Public Utilities, Energy and Transportation ni Konsehal Romeo Calizo ang pagmugna og Technical Working Group (TWG) aron mapadali, mahan-ay ug matuhop ang mga palisiya ug gikinahanglang balaod pagseguro nga matunol ngadto sa mga subscribers ang serbisyo sa mga telecommunication companies (Telcos).

Matud ni Calizo nga maayo kini nga tinguha tungod kay halos tanang sektor na sa katinglingban ang gagamit sa internet busa angayang maayo ang serbisyo nga matunol ngadto sa mga nsubscribers ug unta daling maaksyonan ang problema nga mapaabot sa ilang buhatan.

Mahinumduman nga si Konsehal Malvern Esparcia miduso sa sugyot ordinansa nga nagmando ug nag-aghat sa tanang internet service provider sa syudad sa daling pag-ayo sa unplanned internet connection ug pagpasabot sa mga subscribers sa mga hinungdan niini.

Niini, gisugyot nga magmugna ang TWG nga langkuban sa mga representante gikan sa National Telecommunication Commission (NTC), Globe Telecom, Smart Communications, major telecoms, City Legal ug professional organizations aron tun-an pag-ayo ug makuha ang unod sa ipalabang nga mga palisiya.

Malaumon si Calizo nga mapagaan ang problema sa internet koneksyon kun magmalampuson kini nga tinguha.