Pagmugna og Eng’g Infra Board gisugyot

Gikinahanglang mamugna ang Engineering and Infrastructure Coordinating Board aron tanang proyekto sa syudad adunay koordinasyon tali sa tanang hintungdang ahensya sa gobyerno. Kini ang sugyot ni Konsehal John Michael Seno, chairman sa komite sa Public Works, agig tubag sa special report ni Konsehal Bernie Esparcia atol sa sesyon sa konseho niadtong Lunes kabahin sa giingong gibangag bangagan ug napasagdan nga dalan diha sa Barangay Carmen.

Kulang sa koordinasyon ang akong nakita nga problema sa dili gakahuman nga mga proyekto dinhi sa syudad. Samtang nasugdan na ang proyekto seguro adunay kausaban sa dagan sa pagpatuman niini, sama sa padak-an ang kanal, adunay maigo nga balay o gikinahanglan ang pagre-route sa dagan sa proyekto, dugang ni Seno.

Iyang gipasabot nga subay sa ordinansa sa syudad kun naay ipatuman nga proyekto sa kadalanan ug maapektohan ang dagan sa trapiko mag-isyu og Executive Order ang mayor og closure order subay sa rekomendasyon sa Roads and Traffic Administration (RTA).

Aron malikayan kini nga mga problema, sa dili pa ipatuman ang mga proyekto sa syudad gikinahanglang gyud ang koordinasyon tali sa kagamhanan ug ubang malambigit sa proyekto sama sa TELCOs, COWD, ug uban pang tigpatuman sa mga proyekto ingon man sa maapektohang mga molopyo.