Pagmugna og employment service desk officer sa Brgy 16 giuyonan sa Konseho

GIHINGUSGAN sa Barangay 16, ning syudad nga mapatuman ang mas epektibo nga mekanismo diha sa pagdumala ug paghatag sa panarbaho diha sa lebel sa ilang barangay.

Kini human ang Konseho sa Syudad atol sa sesyon niadtong Lunes nga gidumala ni Bise Mayor Bebot Rodriguez misagop sa resolusyon nga nag-uli sa ilang ordinansa nga nagtukod sa Barangay Public Employment Service Desk ug nagmugna sa posisyon sa Barangay Employment Service Desk Officer.

Kini ang nakit-an sa maong barangay nga usa sa mga paagi aron masiguro ang trabaho ug mapataas ang kahimtang sa ilang ekonomiya dili lamang sa mga tawo nga walay trabaho apan maghatag kini og kita sa syudad ug dugang kalamboan.

Tumong usab sa maong ordinansa ang pagbaton sa data nga kinahanglanon sa mga serbisyo sa Department of Labor and Employment (DOLE) ug makigtambayayong diha sa Public Employment Service Office (PESO) sa dakbayan ug uban ahensya sa gobyerno sa pagpatuman sa lain-laing programa ug proyekto sa pagpanarbaho.

Ang maong lakang miagi sa makuting pagtuon sa mga hintungdang buhatan sa City Hall.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug sa komite sa pamalaod ni Konsehal Edgar Cabanlas.