Pagmugna og council gisugyot ni Moreno

KUSGANONG misugyot si Konsehal Imee Moreno sa pagmugna og council aron masabtan ang mga katuyuan ug matagaan og tingog ang mga miyembro sa Indigenous Peoples (IPs) sa dakbayan sa Cagayan de Oro.

Kini ang gibutyag sa konsehal atol sa miaging hiniusang tigom sa komite sa cultural communities ni Konsehal Roberto Datu Cabaring ug komite sa social services ni Konsehal Girlie Balaba human ang representante sa buhatan sa City Social Welfare and Development (CSWD) mipresentar sa detalyadong budget diin nasukip ang mga programa ug proyekto alang sa mga IP sa tuig 2025.

Mahinumdoman nga kini ang isa sa unod sa special report ni Konsehal Datu Cabaring atol sa miaging sesyon sa konseho.

Gikahingawa ni Konsehal Moreno ang kakulangon tungod kay wala naplastar ang proseso sa pundo alang sa implementasyon sa mga programa alang sa mga lumad sa miaging tuig kay seguro bag-o pa man ang Indigenous Peoples' Mandatory Representative (IPMR) sa konseho sa dakbayan ug nanginahanglan pa og suporta sa mga hintundang buhatan sa City Hall.

Kini ang usa sa nakita ni Konsehal Moreno busa siya misugyot sa pagmugna og council aron magiyahan ug mas masuportahan ang sektor sa mga lumad.

Gipasabot ni Moreno nga diha sa council magsugod ang pagplano, unsay angay’ng buhaton alang sa komunidad sa mga lumad ug sa ingon mamaayo ug  maplastar  ang pagpreparar ug ang proseso sa ilang pundo alang sa ilang umaabot nga mga kalihokan ilabina pahaom sa selebrasyon sa buwan sa IP kada tuig.

Alayon niini, hugot nga misugyot si Moreno nga magmugna og council nga pagalangkoban sa chairman, Mayor Klarex Uy, co-chairman, Konsehal Roberto Cabaring ug uban sa mga representante gikan sa buhatan sa CSWD, City Budget Office, City Legal Office, National Commission on Indigenous Peoples (NCIP), ug pipila ka IP leaders sa syudad, isip mga sakop niini. (RNQuiblat/SP)