Paglukat og mga dokumento sa Civil Registrar mapasayon

Hayan mahatagan na ang mga Kagay-anon sa kasayon paglukat sa mga dokumento gikan sa Civil Registrar. Kini human gitun-an sa konseho sa syudad ubos ni Bise Mayor Bebot Rodriguez ang laraw sa kagamhanan sa dakbayan nga mamugna ang online Census Serbilis Centers (Service Outlets) dinhi sa dakbayan sa Cagayan de Oro.

Nasayran nga ang Philippine Statistics Authority (PSA) naka-develop sa Batch Request Query System (BREQS) nga magtanyag og offline nga pamaagi sa pag-encode sa mga hangyo alang sa mga civil registry documents in security paper ug pagsumete niini ngadto sa mga online Serbilis Outlets pinaagi sa City Civil Registry Office.

Sa maong pamaagi ang lokal nga kagamhanan makatunol sa mas epektibong serbisyo ngadto sa katawhan tungod kay mapasayon na ang pagtubag sa mga hangyo sa civil registry documents. Giingon nga libre ang pagpagamit sa PSA sa nahisgotang sistema.