Paglimpyo sa kanal sa Barangay No. 40 usa sa ilang prioridad

HAYAN masinati ang kalimpyo ug maminusan ang pagbaha diha Barangay 40 ning syudad.

Kini human ang Konseho sa sesyon niadtong Martes nga gidumala ni Bise Mayor Bebot Rodriguez misagop og resolusyon nga nag-uli sa ordinansa sa maong barangay nga may kalabutan sa ilang 2024 Annual Budget nga adunay gibana-banang kinitaan  ug galastohon balor P3,923,500 alang sa implementasyon.

Nag-una sa  ilang gihatagan sa prioridad ang   paghinlo sa  kanal sa tibuok barangay  sa tinguha nga  hamugaway ang pag-agi sa tubig  ingon man mamentinar usab  ang kalimpyo  sa palibot.

Samtang  migahin usab sila sa 5 porsyentong calamity fund alang sa quick response team ingon man sa pagpamalit og supplies nga gamiton panahon sa kalamidad ug igong pundo alang sa mga programa sa Sangguniang Kabataan.

Si Konsehal Yan Lam Lim, Chairman sa Komite Barangay Affairs,  mirekomendar sa maong lakang human nasuta nga kini nahiuyon sa balaod ug mahimo nang ipatuman sa labing dali nga panahon.

Ang resolusyon nga gipalabang sa Konseho  alang maong  katuyuan gipaluyuhan sa Komite sa Barangay Affairs ug Komite sa Pamalaod ug Reglamento  ubos ni Konsehal Edgar Cabanlas.