Pagkolekta sa basura gihangyong dili itunong sa rush hour

NAMATIKDAN ni Konsehal Malvern “Bernie” Esparcia, Chairman sa Komite sa Climate Change Adaptation and Mitigation and Disaster Risk Reduction, nga dili matarong ang pagkolekta sa garbage trucks sa mga basura sa syudad.

Sumala sa special report ni Konsehal Esparcia, nga dili tanan basura nga ilang gikolekta ang masulod sa net hinungdan nga nangakatag sa dalan ang hugaw. Gani lakip sa namatikdan ang oras sa ilang pagkuha sa basura ilabina diha sa kilid sa highway nga gitunong sa rush hour ug tungod sa kadako sa garbage truck nakahatag na hinoon kini sa kadugang kapiot sa dagan sa trapiko, sumpay sa konsehal.

Gikonsidera usab ni Esparcia nga ang dungan nga pag-implementar sa mga proyekto sa kadalanan nga ang ubang dalan gihimong one-way, ang pagdaghan sa mga sakyanan tungod sa no down payment sa mga kompanya ug dili makita ang presensya sa mga Traffic Aide, naka dugang sa problema sa trapiko.

Niini gisugyot ni  Esparcia nga mapadako sa kontraktor sa basura ang ilang net ug ang pagkolekta sa basura dili itunong sa rush hour aron malikayan ang dugang kapiot sa trapik sa syudad.

Ang maong taho ni Konsehal Esparcia giduso ni Bise Mayor Bebot Rodriguez ngadto sa Komite sa Environment ni Konsehal Roger Abaday alang sa tukmang aksyon ug rekomendasyon.