Paghinlo sa kanal, uban pang programa sa Barangay No. 26 gisuportahan sa Konseho

GILAUMAN nga makonhuran ang problema sa  pagbaha diha  sa Barangay 26 ning dakbayan.

Kini tungod kay ang Konseho sa sesyon kagahapon nga gidumala ni Presiding Officer Bise Mayor Bebot Rodriguez paborableng misagop og resolusyon nga nag-uli sa ordinansa sa maong barangay nga may kalabutan sa ilang annual budget nga adunay gibana banang kinitaan ug galastohon balor P5,843,089.

Nag-una sa gihatagan sa prayoridad sa barangay ang paghinlo sa  mga kanal  sa ilang dapit  sa tinguha nga makontrolar ang pagbaha.

Samtang  migahin usab ang barangay og igong kantidad  alang sa pagrehabilitar sa ilang multi-purpose hall, drainage system, pag-instalar og dugang suga sa kadalanan ug uban pang programa ug proyekto nga maghatag kaarangan sa  ilang barangay.

Ang resolusyon nga gisagop sa konseho alang sa maong katuyuan gipaluyohan sa Komite sa Barangay Affairs ni Konsehal Yan Lam Lim ug Komite sa Pamalaod ug Reglamento ubos ni Konsehal Edgar Cabanlas.