Paghatag og programa alang sa OSY gidayeg ni Abbu

GIDAYEG ni Konsehal Joey Abbu, Jr., chairman sa komite sa labor and employment, ang mga opisyal sa Sangguniang Kabataan (SK) sa Barangay 39, ning syudad.

Kini human nasayran sa konsehal nga usa sa mga programa nga ilang ipatuman karong tuiga mao ang paghatag og vocational training program ngadto sa ilang out-of school youth (OSY).

Kini ang tipik sa gipundohan sa gisumiteng annual budget sa SK sa barangay nga adunay bana-banang kinitaan ug galastohon nga balor P600,945.00.

Gipasabot ni Abbu nga dalaygon kini nga programa sa SK kay pinaagi niini makunhuran ang gidaghanon sa OSY sa ilang dapit kay makaangkon naman sila sa kahigayonan sa pagpanarbaho.

Ang nahisgotang annual budget sa SK sa Barangay 39 gipaabot nga tukion sa komite sa sports and youth development ni Konsehal Kenneth John Sacala. (RNQuiblat/SP)