Paghatag moratorium sa balayrnon sa tubig, kuryenteug uban pa gisuportahan sa konseho

PABORABLENG giaprobahan sa konseho sa syudad sa sesyon niadtong Lunes nga gidumala ni Bise Mayor Kikang Uy ang tulo ka managlahing resolusyon nga giduso ni konsehal George Goking.

Kini naglakip sa resolusyon nga naghangyo sa mga tag-iyag establisamento ug institusyon paghatag og moratorium sa balayrunon sa kuryente, tubig, telekumunikasyon, rental ug loan amortization.

Giuyunan usab sa konseho ang resolusyon nga naghangyo sa mga bangko nga ipadayon ang ilang normal nga banking hours taliwala nga gipaubos sa Modified Enhanced Community Qurantine ang syudad.

Sa susamang higayon, giaprobahan usab sa konseho ang resolusyon nga naghangyo sa Department of Health (DOH) pagdeklara ug pagcategorize sa mga empleyado sa bangko isip mga Frontline Essential Workers ug paghatag kanila sa prioridad sa bakuna sama sa ubang sector aron dili mabalda ang financial services sa mga lugar nga gipaubos sa MECQ.

Ang mga resolusyon nga gipalabang sa konseho alang sa maong katuyuan gipaluyuhan sa komite sa trade and commerce ubos ni konsehal Goking ug komite sa pamalaod ug reglamento ni konsehal Ian Mark Nacaya.