Paghatag insentibo sa mga hamtong, gisugyot ni Konsehal Daba

GISUGYOT ni Konsehal Reuben Daba ang paghatag og insentibo ngadto sa mga senior citizen nga makakompleto sa ilang pagpabakuna.

Kini ang aksyon sa konsehal sa sesyon sa konseho niadtong Lunes nga gidumala ni Bise Mayor Kikang Uy human nasuta ang kasagarang mulo sa mga hamtong nganong magmakuli sila sa pagpabakuna.

Gipasabot ni konsehal Daba nga didto mismo sa vaccination area nga diin boluntaryo siyang miabag isip usa ka nurse, nasayran nga kasagarang mulo sa mga hamtong nganong magmakuli sila sa pagpabakuna tungod kay wala silay baon sama sa paniudto ug ang ilang ipamasahi ila nalang kining ipalit og tambal.

Matod sa konsehal nga anugon kaayo kon dili mabakunahan sa gitakdang higayon ang mga hamtong labina nga kasagaran kanila aduna nay comorbidity.

Ang maong sugyot giduso ngadto sa komite sa senior citizen ubos ni Konsehal Roger Abaday alang sa dugang pagtuon.