Paghatag insentibo sa mga Cugmanons nga magdala sa kalamposan giaprobahan

PWEDE nang ipatuman sa Barangay Cugman ang ilang giduso nga ordinansa nga mahatag og insentibo sa mga residente nga mahimong topnotchers sa national board ug bar examinations ug ang makadaog sa national ug international competitions.

Kini human ang konseho sa syudad sa milabayng sesyon nga gidumala ni Presiding Officer Pro Tempore Romeo Calizo hiniusang misagop sa resolusyon nga nag-uli sa ordinansa sa barangay diin nasukip ang ilang pundo alang sa maong katuyuan.

Tumong sa konseho sa barangay Cugman nga maagni ug madasig ang kabatan-onon ug katawhan sa dapit aron maningkamot sa ilang pagtuon ug pakiglambigit sa natad sa paugnat sa kusog aron malayo ang katawhan sa daotang bisyo.

Makadawat ang 1st Place sa Plaque of Appreciation ug P20mil; 2nd Place, P18k ug Plaque of appreciation; 3rd Place, P16k ug Plaque; 4th place, P14k; 5th place, 12k; 6th place, P10k; 7th place, P8k; 8th place, P6k; 9th place, P4k samtang makadawat sa plaque ug P2mil ang anaa sa 10th place.

Ang maong resolusyon sa barangay Cugman miagi sa makuting pagtuon sa mga komite sa konseho ug nasuta nga nasubay sa balaod ug mahimo nang ipatuman.

Ang resolusyon nga gipalabang sa konseho gipaluyohan sa komite sa pamalaod ni Konsehal Edgar Cabanlas. (MLRapanot/SP)