Pagdili pagduaw sa mga sementeryo gihangyo nga tun-an

NAGHANGYO si Konsehal Edgar Cabanlas, chairman sa Komite sa Urban and Rural Poor and Housing Development, sa Local IATF nga subling tun-an ang pagdili sa pagpasulod sa mga sementeryo dinhi sa syudad.

Kini ang unod sa special report ni Cabanlas atol sa sesyon niadtong Martes nga gidumala ni Bise Mayor Kikang Uy.

Sumala sa konsehal nga gitugotan ang katawhan pag-adto sa mga kamerkadohan apan ang pagbisita sa mga minahal sa kinabuhi nga mitaliwan sa laing kalibotan mao ang gidili nga unta kini tradisyon sa mga Pilipino.

Gipasabot ni Cabanlas nga unta makonsidera kining hangyo sa katawhan nga matugotan silang makasulod sa sementeryo aron mobisita sa ilang mga kaparentihan labina nga ang uban mopahigayon og pagpangaliya kay batasan nato kining mga

Pilipino, hinoon sundon gihapon ang mga health protocols nga gipatuman sa gobyerno aron malikayan ang pagkaylap sa Covid-19.

Niini gihangyo ni Cabanlas nga maduso kini nga sugyot ngadto sa komite sa panglawas ni Konsehal Malou Gaane ug komite sa Public Order and Safety ni konsehal Romeo Calizo alang sa dugang pagtuon.