Pagdeklara sa porsyon sa Dansolihon nga Minahang Bayan, konsiderahon sa komite ni Abaday

KONSIDERAHON sa Komite sa Environment sa Konseho ubos ni Konsehal Roger Abaday ang sulat ni Osin Sinsuat, chief sa Geosciences Division sa Mines and Geosciences Bureau (MGB).

Kini paborableng nag-endorsar nga madeklara ang usa ka parselang lote nga adunay gilapdon nga 21.1994 hektarya nga nahimutang sa Barangay Dansolihon ning syudad isip Minahang Bayan o People Scale Mining area.

Mahinumduman nga ang United Higaonon Multi-Purpose Cooperative unang miduso sa ilang petisyon ngadto sa ahensya alang sa maong katuyuan.

Si Sinsuat mibutyag nga segun sa gipahigayong assessment ug delineation sa dapit niadtong Septembre 24 , 2021 nasuta nga kana nga porsyon sa Barangay Dansolihon gitumbok nga usa ka “mineralized with gold” nga lugar nga dayag sa dapit .

Subay niini, ang Komite gipaabot nga mopatawag og tigom uban sa mga hintungdang ahensya sa gobyerno aron kini hiniusang hisgutan.