Pagbaligyag sigarilyo, ilimnong makahubog ngadto sa minors gidili sa Dansolihon

HINGPIT na nga  gidili   ang pagpamaligyag ilimnong  makahubog  ngadto sa mga menor de edad sa diha Barangay Dansolihon.

Kini human ang Konseho sa syudad sa   sesyon  kagahapon nga gidumala ni Presiding Officer Pro Tempore Konsehal Romeo Calizo  hiniusang  misagop og resolusyon nga nag-uli sa ordinansa  sa maong barangay  nga nagdili  sa pagpamaligya  ingon man  pagtanyag og ilimnong makahubog  ug  sigarilyo  ngadto sa mga menor de edad  ug nagpahamtang og silot sa  makalapas.

Tumong sa maong ordinansa   nga maprotektahan ang kabataan  ug mahilayo sa dautang mga bisyo.

Sa unang kalapasan, ang  nagbaligya  o’ ang nakalapas isyohan  og pasidaan sa barangay ug ipaubos  sa usa ka oras nga counseling  ug community service. Pagbadlong  ug  ipatawag usab  sa barangay alang sa interogasyon  ug tulo  ka oras nga counseling ug community service sa ikaduhang kalapasan, samtang pagbadlong ug ipatawag sa barangay alang sa tulo ka oras nga counseling ug community service ingon man P1,000.00 nga multa alang sa ikatulong kalapasan.

Ang resolusyon nga gipalabang sa Konseho alang sa maong katoyuan gipaluyuhan sa komite sa barangay affairs ni Konsehal  Yan Lam Lim  ug komite sa pamalaod ug reglamento ubos ni Konsehal  Edgar Cabanlas. (Text and photo by JRGalano/SP)