Pagbag-o sa ngalan sa Camansi Integrated School giuyonan sa Konseho

HINIUSANG giuyonan sa konseho sa syudad sa sesyon niadtong Lunes nga gidumala ni Bise Mayor Bebot Rodriguez ang pagbag-o sa ngalan sa Camansi Integrated School ngadto saa Apo Malaki Elementary Integrated School pinasubay  sa Indigenous People’s Education (IPED) Program.

Gisuportahan sa konseho ang maong lakang isip pagpasidungog ni Apo Malaki aron usab mapreserbar ang ilang kultura, espirituhanong mga mithi  ingon man ang kabililhon sa tradisyon sa ilang tribo.

Sa nasayran, nga ang maong tunghaan gitukod sulod sa yutang kabilin ni Apo Malaki nga sakop  Higaonon Indigenous Cultural Community (ICC)  nga adunay  panugot sa Sinunop Higaonon Tribal Community.

Ang pagbag-o sa ngalan sa  nahisgutang  tunghaan gikinahanglan aron  mahibaluan sa sunod nga mga henerasyon nga mga Kagay-anon nga aduna pay nagpabilin nga  kaliwat  Lumad sa syudad.

Niini, ang konseho misagop og resolusyon alang sa maong katuyoan nga gipaluyohan sa Komite sa Edukasyon ni Konsehal Suzette Magtajas-Daba ug Komite sa Pamalaod ug Reglamento ni Konsehal Edgar Cabanlas.