Pag-revise sa animal control, welfare ordinance padayon nga gitun-an sa komite ni Pascual

PADAYON nga gitun-an sa Komite sa Agriculture ni Konsehal Jay R. Pascual ang sugyot pag-revise sa animal control and welfare ordinance sa syudad.

Kini human si City Veterinarian Dr. Perla T. Asis namahayag atol sa tigom sa komite nga kinahanglan ug angayan na gayud ang pag-revise niini tungod kay adunay mga probisyon ang maong ordinansa nga dili na applicable karong panahona.

Si Konsehal Ian Mark Q. Nacaya, kinsa maoy nangamahan sa maong ordinansa, hugot nga misuporta sa sugyot pag-revise sa tinguha nga mahaom kini sa kasamtangang panginahanglanon sama sa pagdumala o’ kasegurohan sa mga hayop nga na impound ingon man ang responsibilidad sa tag-iya ug uban pa.

Subay niini, ang komite mimugna og Technical Working Group (TWG) sa panguna ni Dr. Asis ug siya gitugotan sa pagtudlo sa iyang mga miyembro aron maoy motuki sa maong plano ug sa pagduso sa ilang report sa sunod nga tigom sa komite.