Pag-redevelop sa Bolonsori Cemetery hapit na matibawas - Esparcia

SI Konsehal Bernie Esparcia, chairman sa Komite sa Climate Change Adaptation & Mitigation and Disaster Risk Reduction, mibutyag nga hapit na matibawas ang pag-redevelop sa Bolonsori Cemetery ug anaa na kini sa otsenta porsyento (80%) nga pag-trabaho.

Kini ang unod sa special report ni Konsehal Esparcia atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Esparcia nga personal niyang gibisita ang maong sam-ang uban ang mga kawani sa City Local Environment and Natural Office (CLENRO) ug nasuta niini nga mahimo nang magamit sa mga kabus nga mitaliwan sa laing kalibutan ang dose (12) ka mga viewing chapel nga libre sulod sa tulo ka adlaw nga paghaya ug kumpleto sa kahimanan diin aduna kini aircon, libreng bulak, lungon, limpyo nga pansayan ug lababo ingon man libreng cremation nga serbisyo sa maong sam-ang.

Giklaro usab ni Esparcia nga walay resort nga gitukod sulod sa maong sam-ang hinoon adunay kini parke alang sa mga kabanay nga buot mobisita ug magkatipok-tipok sa dapit.

Gipasalamatan sa konsehal si Mayor Rolando Klarex Uy tungod sa programa ug serbisyong nga gitunol sa mga kabus nga libre ilabina kadtong dili makagahum sa pagbayad.

Nunot niini gisugyot ni Konsehal Bernie Esparcia ngadto sa konseho nga mopalabang ug ordinansa alang sa pagtunol ug hazard pay ngadto sa mga kawani nga anaa sa cremation area.

Alayon niini ang sugyot ni Esparcia giduso ni Bise Mayor Bebot Rodriguez sa Komite sa Health, Nutrition & Health Insurance ni Konsehal Maria Lourdes Gaane alang sa dugang pagtuon ug rekomendasyon.