Pag-institutionalize sa organic agriculture aprobado na
HINIUSANG giuyonan sa Konseho atol sa sesyon sa Lunes nga gidumala ni Majority Floor Leader Edgar S. Cabanlas ang ordinansa nga nagtumong sa pag-institutionalize sa organic agriculture dinhi sa syudad diin gihiusa ang lumad ug natural nga sistema sa pagpanguma.
Ang maong organic farming, nga usa ka programa sa Department of Agriculture (DA), magsilbing pundasyon alang sa mga mag-uuma diha sa ilang pag-atiman sa kalikopan, pagsagop sa mga maayong paagi sa agrikultura samtang nagsiguro nga madawat sa katilingban ang igong produksiyon sa pagkaon.
Tumong usab niini ang dili paggamit sa mga makadaot nga kemikal ug abono, sa tuyo nga luwas gayod sa mga sakit ang mga produkto sa uma dinhi sa syudad.
Kini ang nakit-ang solusyon aron luwas, masustansya ug barato ang pagkaon nga makonsumo sa katawhan.
Niini, nagpasalamat si Konsehal Jay Roa Pascual, Chairman sa Komite sa Agriculture, ngadto sa Department of Agriculture tungod sa pagpatuman sa maong proyekto dinhi sa syudad.
Naglaom ang konsehal nga daghang mag-uuma sa dakbayan ang mahatagan og dugang kaugmaran sa kinabuhi pinaagi sa maong organic agriculture program.
Ang maong ordinansa gipaluyohan usab sa Komite sa Pamalaod ug Reglamento ni Konsehal Edgar S. Cabanlas.
Comentarios