Pag-instalar og suga, CCTV, ubnp sa Brgy Agusan suportado sa konseho

Hingpit nga kalamboan ang matagamtaman sa katawhan sa Barangay Agusan karong tuiga. Kini human ang konseho sa syudad sa sesyon niadtong Lunes misagop sa resolusyon nga nag-uli sa ordinansa sa barangay diin nasukip ang ilang 2023 Annual Budget alang sa hingpit nga pagpatuman.

Tipik sa gipunduhan sa barangay mao ang proyekto pag-instalar og suga sa kadalanan, pagsemento sa dalan gikan sa Zone 1 -7, pagtukod og drainage sa Zone 4, pagtukod og foot bridge sa Zone 4 Sarat, pagtukod sa BDRRMC quarters and evacuation center ug pagrehabilitar sa multi-purpose hall.

Migahin usab ang barangay og igong pundo alang sa proyekto pagkoral sa multi-purpose hall, pagpalit og usa ka unit nga garbage truck, pagpalit og pag-instalar sa CCTV Camera sa Zone 1-7 National Highway ug daghan pang ubang nga gilantawng magpalambo sa ilang dapit.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Edgar Cabanlas.