Pag-imposar sa tipping fee angayan nga tun-an

HUGOT nga gihangyo ni Konsehal John Michael Seno, chairman sa komite sa Sports and Youth Development, nga matun-an ang pag-imposar sa tipping fee sa household garbage disposal ngadto sa Sanitary Landfill sa syudad.

Kini ang unod sa special report ni Konsehal Seno sa sesyon sa konseho niadtong Lunes nga gidumala ni Bise Mayor Kikang Uy human nasuta sa konsehal nga adunay pagsumpaki sa duha ka ordinansa nga gisagop sa syudad.

Gipasabot ni konsehal Seno nga basi sa Ordinance No. 12860-2014, Section 219 kon Revenue Code sa dakbayan nag-ingon nga walay kolektahon basta boluntaryo maglabay sa ilang mga basura sa panimalay o household garbage gamit ang pribadong sakyanan samtang sa Ordinance No. 13378-2018 kun Integrated Ecological Solid Waste Management, Section 27 nagpaghamtang kini og bayronon alang sa tanang pribadong gahakot og basura sa panimalay.

Matod sa konsehal nga nagbayad man og insaktong buhis ang mga namuyo sa subdivision apan nganong pabayron man gihapon sa tipping fees ang ilang gi hire nga private garbage collector nga maoy galabay sa ilang basura ngadto sa landfill.

Nasayran nga boot usab matino ni konsehal Seno kun unsa ka tinuod nga kasamtangang gisuspende sa buhatan sa City Local Environment and Natural Resources (CLENRO) ang pagpangolekta sa tipping fee sa household garbage hangtod Marso ning tuig.

Niini giduso ni Bise Mayor Kikang Uy ang special report ni Konsehal Seno ngadto sa komite sa Environment ubos ni konsehal Enrico Salcedo alang sa pagtoon og tukmang rekomendasyon.