Pag-andam sa mga kakulian sa fiesta core events gisugyot

GISUGYOT ni Konsehal Bernie Esparcia nga mapangandaman ang mga kakulian o’ problema dinha sa pagpahigayon sa mga core events pahaum sa kasaulogan sa tinuig nga pista sa syudad.

Mao kini ang sugyot sa konsehal sa special report ni Konsehal James Judith II, sa sesyon sa konseho niadtong Lunes nga gidumala ni Bise Mayor Bebot Rodriguez, kalabot sa nasinating problema sa sound system ug pagkawala sa kuryente sa pagpahigayon sa 2023 Miss Cagayan de Oro.

Matod ni Esparcia nga sa maong matang sa kalihukan nga live dili gayud malikayan ang mga problema apan mahimo kining mapangandaman daan pinaagi sa pagbuhat og Plan B.

Gipasabot ni Esparcia nga sa pagplano sa kalihokan, angayang maandam ang dugang mga lakang sa panahon nga masinati ang mga kakulian aron daling matubag ang problema ug mapadayon ang kalihukan.

Niini, gipasalamatan ni Esparcia ang tanang misuporta sa kalampusan sa mga kalihukan atol sa pagsaulog sa kapistahan sa syudad.