Pag-amendar sa traffic ordinance gilaraw

SI Konsehal George Goking, chairman sa komite sa ways and means, naglaraw sa subling pagtuon sa balaod sa trapiko sa syudad ilabina ang mga gipahamtang nga multa sa matag kalapasan.

Tumong sa konsehal nga mapangitaan sa pamaagi nga madugangan ang kitang mosulod sa panudlanan sa dakbayan.

Gipasabot ni Goking nga sa kasamtangan ang syudad naghatag og 25% nga mahimong bayaran sa mga kalapasan kun mopili og community service nga moabot sa 75% ang posibleng serbisyohan gikan sa gipahamtang nga multa.

Matod niya nga ang maong pamaagi nagkuha og dakong panahon gikan sa mga nasikop nga draybers tungod kay mahimo mang magserbisyo hangtod sa 75% sa gipahamtang nga kalapasan.

Dugang pa, ang kahimtang sa ekonomiya naglisod pa pagbarug busa angayan kini nga marepaso aron madugangan usab ang kinitaan sa syudad ug matabangan ang mga nakahimo og kalapasan ingon man mahatagan sa kahigayonan paglimpyo sa ilang mga obligasyon sa multang gipahamtang.