Pag-aksyon sa problema sa sub fire stations sa dakbayan, suportado ni Konsehal Calizo

SUPORTADO ni Konsehal Romeo Calizo, Chairman sa Komite sa Public Order and Safety, ang sugyot nga aksyonan ang giingong  problema sa  mga  fire substation sa syudad.

Kini human si Konsehal James Judith sa sesyon sa konseho niadtong Lunes nga gidumala ni Bise Mayor Jocelyn Rodriguez, mitaho  sa problema sa Macabalan Fire Station  kalabot sa ilang fire truck nga giingong depektado hinungdan nga dili maka-responde diha mismo sa ilang area of responsibility (AoR) sa panahon nga adunay sunog.

Sumala sa konsehal nga nahibulong siya nga sa mga katuigan nga nilabay, karon lang nga adunay  nataho  sa konseho sa susamang problema.

Mipasabot ang konsehal nga gani, nakapahigayon man siya og mga random inspection sa mga sub fire stations sama diha sa Kauswagan ug wala siyay nadawat nga mga  problema.

Sa iyang bahin, nagpasalamat si Calizo nga nataho kini nga problema aron sa ingon  mahatagan kini sa igong  aksyon labina nga mahinungdanon  kaayo  ang  mga  fire trucks diha sa pagresponde sa sunog alang sa kaluwasan sa kinabuhi sa katawhan.