Pag-ablig police substation sa Balubal, gisuportahan ni Konsehal Calizo

DAKONG uyon si Konsehal Romeo Calizo, Chairman sa Komite sa Public Order sa intensyon ni Konsehal James Judith nga gikinahanglan ang presensya sa kapolisan aron mapatunhay ang kahusay ug kalinaw.

Kini ang reaksyon sa konsehal sa special report ni Konsehal James Judith sa sesyon sa Konseho niadtong Lunes nga gidumala ni Bise Mayor Bebot Rodriguez nga  nagpahibalo nga ablihan na ang police substation diha sa Balubal ug  mihangyo sa pagsagop og resolusyon nga magpasidungog  sa kapolisan nga naningkamot  nga madugangan ang police substation  alang sa dugang seguridad.

Sumala ni Calizo nga sa dili pa aprobahan ang gisugyot nga resolusyon, angayan nga  mahisgutan una kini sa hintungdang komite  aron usab  mapaminaw   ang panahom sa kapolisan  ug usab  madungog nganong wala pamay substation sa  maong dapit.

Gipasabot ni Calizo nga ang presensya sa law enforcement dili lang taman sa pag-establisar og base sa command ug control tungod kay dapat adunay mas maayo nga mga pamaagi ug laraw aron mabati ang ilang presensya bisan sa pinakalayong dapit sa syudad.

Sa pag-neutralize sa hulga sa kriminalidad, dili lang ang pag-establisar sa station ang tubag, apan  kinahanglan aduna pay mga ideas ug laraw  nga angayang pagbuhaton ang  kapolisan, dugang pamahayag  ni Konsehal Calizo.