P73M balor nga SB3 giuyonan sa konseho

Operasyon sa City College, paghitsas sa pipila ka buhatan sa City Hall gipundohan. Kapin sa P73 milyones balor nga pundo pagpatuman sa dugang mga programa ug proyekto sa City Hall ang giuyonan sa konseho sa syudad ubos ni Bise Mayor Bebot Rodriguez. Kini human giaprobahan sa sesyon sa konseho kagahapon ang Supplemental Budget No. 3 sa General Fund alang sa tuig 2023 nga adunay gibanabanang kinitaan ug galastohon balor P73,267,991.00.

Lakip sa gipundohan mao ang operasyon sa City College balor P10 milyones. Mahinumduman nga namugna ang City College pinaagi sa Ordinance No. 14564-2023 ug gilantaw nga makasugod na sa operasyon sa labing daling panahon aron maabagan ang mga Kagay-anong tinun-an nga makahuman sa kolehiyo.

Gipundohan usab ubos sa SB3 ang pagpalit sa 3D mapping projector nga hitsas sa accessories (P11,581,500.00), pagpalig-on sa seguridad dinha sa CDO River Boulevard pinaagi sa pagbutang og dugang security personnel (P1,428,000.00), pagtukod sa perimeter fence dinha sa Kauswagan National High School (P1,589,542.00), ug pagtukod sa opisina sa City Reclamation Board (P821,681.00) ug workshop area alang sa pagpanday sa mga lungon (P1,260,000.00).

Sa maong SB3 gigahinan usab ang balayronon sa dakbayan alang sa kuryente balor P45,057,268.00. Ang pagpalabang sa ordinansa nga nag-aprobar sa SB3 gihangyo ni Mayor Klarex Uy nga mapalabang sa daling panahon sa tinguha nga masugdan gilayon ang pagpatuman sa gikinahanglang proyekto ug programa nga magdala sa dugang kaarangan sa kinabuhi sa katawhan.