P7.9M 2023 annual budget sa brgy San Simon mapatuman na

Mahimo nang ipatuman sa Barangay San Simon ang ilang mga programa ug proyekto nga nahan-ay karong tuiga. Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2023 Annual Budget nga adunay gibanabanang kinitaan ug galastohon balor P7,984,135.00.

Gihatagan og prayoridad sa barangay nga mapatuman karong tuiga ang mga proyekto ug programang gipundohan ubos sa 20% Development Fund nga naglakip sa proyekto paglimpyo sa mga kanal, pag-instalar og mga suga sa kadalanan, pagrehabilitar sa multi-purpose hall, pagtul-id sa kadalanan ug sistema sa panubig.

Gipundohan usab sa barangay ang pagtunol og benepisyo sa mga kawani niini, maintenance expenses lakip na sa training, gamit sa opisina, programa sa nutrisyon ug uban pang operating expenses.

Gigahin usab og igong pundo ang pagpatuman sa mga lakang pagtubag sa panginahanglan sa katawhan panahon sa kalamidad, pagtukod og evacuation center, programa alang sa kabatan-onan ug uban pang mga programa nga gilantawng maghatag og dugang kalamboan sa kinabuhi sa katawhan sa barangay.

Ang resolusyon nga gipasaka sa konseho alang sa maong katuyuan gipaluyohan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya.