P7.5B, budget sa CDO sa 2022 Social services adunay 36.07% nga pahat

BALOR P7.5 bilyones ang gisugyot ni Mayor Oscar Moreno nga budget sa dakbayan sa Cagayan de Oro alang sa umaabot tuig 2022 nga naglangkob sa P6.58 bilyones kapin alang sa General Fund ug P914.9 milyones kapin alang sa Special Account/City Economic Enterprises.

Kini adunay omento nga P250 milyones gikan sa P7.25 bilyones nga budget karong tuig 2021.

Sa gisumete sa mayor nga 2022 Annual Budget ngadto sa konseho sa syudad ubos ni Bise Mayor Kikang Uy gihatagan og dakong pahat ang sektor sa katilingbanong serbisyo nga mokabat sa P2.7 bilyones kon 36.07% nga naglakip sa P1.51 bilyones nga pundo alang sa Health, Nutrition, Population Control and Hospital Services ug P1.18 bilyones kapin nga pundo alang sa Social Security, Social Services and Welfare.

Samtang ang Economic Services sector adunay 34.13% nga pahat kon kapin sa P2.55 bilyones ug ang General Public Services sector adunay 29.80% kon kapin sa P2.23 bilyones.

Sa budget message sa mayor gipahibalo nga walay ipahamtang nga bag-ong balayronon sa buluhisan kun dili ipatuman sa sunod tuig ang hingpit nga koleksyon sa buhis pinaagi sa mga programang magdala og dynamic tax information campaign sama sa online payment system, ease-of-doing business, tax payment discounts ug uban pa.

Dako ang paghinaut ni Mayor Moreno nga sa gisugyot nga budget pamadayon ang mga nahan-ay nga programa nga magdala sa dugang kalamboan ug kaarangan sa kinabuhi sa katawhan taliwala niining nasinating pandemya dala sa Covid-19.