P608 mil balor nga pundo sa Brgy 22 SK giuyonan

HAYAN mapatuman na hingpit sa Sangguniang Kabataan (SK) sa Barangay No. 22 ang ilang mga programa ug proyekto nga gipundohan karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolosyon nga nag-uli sa resolosyon sa barangay diin nasukip ang 2023 SK Annual Budget balor P608,186.00 alang sa hingpit nga implementasyon.

Lakip sa gipunduhan sa kabatan-onan sa barangay mao ang pagpatuman sa programa pagproteher sa kinaiyahan, pagpakatap sa dugang kahibalo kabahin sa saktong pag-atiman sa panglawas, active citizenship ug capability building.

Ang maong mga programa ug proyekto gitumong sa pag-aghat sa kabatan-onan nga makiglambigit sa mga kalihokan nga magdala og dugang kaarangan sa ilang mga kinabuhi.

Ang resolusyon nga gisagop sa konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Edgar Cabanlas.