P48M 2022 annual budget sa Lapasan giuyunan sa Konseho

HINGPIT nang mapatuman sa konseho sa barangay Lapasan ang ilang mga programa ug proyekto nga gipundohan karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez, misagop sa resolusyon nga nag-uli sa ordinansa sa barangay diin nasukip ang ilang 2022 Annual Budget nga mobalor og P48,035,190.00.

Lakip sa gipunduhan sa barangay mao ang proyekto pagrehabilitar sa covered court, pagtukod og reading center, pagtul-id sa barangay development centers, pagtukod og playground sa plaza, pagtul-id sa multi-purpose hall facilities ug heath center sa Sto. Nino, Lapasan.

Migahin usab ang barangay og igong pundo alang sa pag-rehabilitar sa motorpool, pagpalambo sa bag-ong multi-purpose building nahimutang dool sa covered court ug pag-improbar sa BCPC; VAWC shelters.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam S. Lim ug komite sa pamalaod ni Konsehal Ian Mark Nacaya. (SP/JRGalano)