P45M kapin nga annual budget sa Balulang giuyonan sa konseho

Mapatuman na sa konseho sa barangay Balulang ang mga proyekto ug programang gihatagan og prioridad karong tuiga.

Kini human ang konseho sa syudad sa sesyon kagahapong adlawa nga gidumala ni Presiding Officer-Protempore Konsehal Edgar Cabanlas misagop sa resolosyon nga nag-uli sa ordinansa sa barangay diin nasukip ang ilang Annual Budget sa tuig 2023 nga mobalor og P45,755,311.00.

Lakip sa gipunduhan sa barangay mao ang pagpadayon sa pagpatuman sa pipila ka mga proyekto sa imprastraktura ug uban pang programa nga makahatag og serbisyo sa katawhan nga makatabang sa kalamboan sa ilang dapit.

Ang resolosyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.