P43M balor nga Annual Budget sa Canitoan giuyonan sa konseho

Mapatuman na sa Barangay Canitoan ang ilang mga programa ug proyekto karong tuiga.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodgriguez misagop sa resolusyon nga nag-uli sa ordinansa sa Canitoan diin nasukip ang ilang 2022 Annual Budget nga mobalor og P43,180,614.00 alang sa hingpit nga implementasyon.

Tipik sa gigahinan sa barangay sa maong budget karong tuiga ang pagpalit og 1 unit rescue vehicle, pagrehabilitar sa drainage system sa pipila ka sona, pagtukod og pansayan sa Zone 8, pagrehabilitar sa barangay isolation unit ug pagpalit og food assistance ug relief goods alang sa pagtubag sa Covid 19.

Migahin usab ang barangay og lote nga tukuran sa pampublikong sam-ang, pagpalit og duha ka unit nga aircon, duha ka unit nga telebisyon ug uban pang gikinahanglan sa inadlaw adlawng operasyon sa buhatan.

Ang resolusyon nga gipalabang sa konseho alang sa maong katuyuan gipaluyuhan sa komite sa Barangay Affairs ni Konsehal Yan Lam Lim ug komite sa pamalaod ni Konsehal Ian Mark Nacaya.