P3.51M balor nga budget sa Brgy 17 mapatuman na

SA tinguha nga mapatuman na ang mga programa ug proyekto sa Barangay 17 karong tuiga, ang Konseho sa syudad sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa sa barangay diin nasukip ang ilang 2022 Annual Budget nga adunay gibanabanang kinitaan ug galastohon balor P3,517,043. 00.

Lakip sa gigahinan sa maong budget ang paghinlo sa ilang drainage, pag-instalar og suga sa kadalanan, pagrehabilitar sa ilang Multi Purpose Hall ug uban pa.

Ang maong lakang miagi sa makuting pagtuon ug deliberasyon sa mga hintungdang komite sa konseho ug nasuta nga nahiuyon sa balaod ug mahimo nang ipatuman sa labing dali nga panahon.

Ang resolusyon sa nga gipalabang sa Konseho alang sa maong katuyuan gipaluyuhan sa Komite sa Barangay Affairs ni Konsehal Yan Lam S. Lim ug Komite sa Pamalaod ni Konsehal Ian Mark Nacaya.