P22.6M budget sa Agusan sa 2022 mapatuman na

GIUYUNAN na sa Konseho sa Syudad sa sesyon niadtong Lunes nga gidumala ni Bise Mayor Kikang Uy ang resolusyon nga nag-uli sa ordinansa sa Barangay Agusan diin nasukip ang ilang Annual Budget nga adunay gibanabanang kinitaan ug galastohon balor P22.6 milyones kapin.

Lakip sa gipunduhan sa barangay nga mapatuman karong tuiga mao ang pag-instalar og suga sa kadalanan, pag-abli og dalan gikan sa Zone 7 paingon sa Zone 10, pagtukod og Multi Purpose hall ug reading center ug BDRRMC quarters and evaluation Center-phase 1.

Gigahinan usab sa barangay ang pagrehabilitar sa pansayan sa ilang merkado publiko ug gymnasium, pagrehabilitar sa sistema sa panubig sa Zone 6, pagrehabilitar sa health center ug uban pang mga programa ug proyekto nga gilantawng maghatag og kalamboan sa barangay.

Si Konsehal Yan Lam S. Lim, chairman sa komite sa barangays affairs, mibutyag nga ang budget sa barangay miagi sa makuting pagtuon ug deliberasyon sa mga hintundang komite sa konseho ug sa lain laing depatamento sa City Hall.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Lim ug Komite sa Pamalaod ni Konsehal Ian Mark Nacaya.