P1M gigahin sa Tablon SK sa env’t protection program

Kapin sa P1 ka milyon ang gigahin sa Sangguniang Kabataan (SK) sa Barangay Tablon aron magamit dinha sa pagpatuman sa mga programa alang sa capability building, pagproteher sa kinaiyahan ug climate change adaptation. Sa sesyon sa konseho niadtong Lunes nga gidumala ni Bise Mayor Bebot Rodriguez, gisagop ang resolosyon nga nag-uli sa resolosyon sa Barangay Tablon diin nasukip ang 2023 SK Annual Budget nga adunay gibanabanang kinitaan ug galastohon balor P3,906,315.00.

Lakip sa gihatagan og prioridad sa SK sa barangay nga mapatuman karong tuiga mao ang programa kabahin sa edukasyon ilabina ang paghatag og dugang kahibalo sa kabataan sa natad sa panglawas, sexual ug reproductive health, pagpalapad sa kampanya kontra droga, youth employment and livelihood, gender sensitivity ug mga kalihokan pahaom sa kasaulogan sa Linggo ng Kabataan.

Migahin usab ang barangay og igong pundo nga magamit sa pagtul-id sa SK office, pagpalit og usa ka unit Corei5 Laptop ug usa ka unit computer set with printer ug uban pang proyekto nga makapadasig sa kabatan-onan diha sa pagkab-ot sa dugang kaarangan ug kalamboan sa ilang kinabuhi.

Ang resolusyon nga gisagop sa konseho alang sa maong katuyuan gipaluyohan sa Komite sa Sports and Youth Development ni Konsehal John Michael Seno ug Komite sa Pamalaod ni Konsehal Edgar Cabanlas.