P12M balor nga SB2 sa Balulang uyunan sa konseho

GIPAABOT uyunan sa Konseho sa Syudad, sa sesyon karong hapon nga dumalahon ni Bise Mayor Bebot Rodriguez, ang sugyot resolusyon nga mag-uli sa ordinansa sa Barangay Balulang diin nasukip ang ilang Supplemental Budget No.1 balor P12,514,971.00.

Tipik sa gipundohan sa maong budget ang pagtul-id sa multi-purpose hall balor P906 mil kapin, pagtukod sa drainage sytem ingon man paglimpyo sa mga kanal balor P906 mil kapin, pagrehabilitar ug pag-aspalto sa kadalanan ug pathways balor P906 mil kapin.

Sa laing bahin gigahinan usab sa barangay ang pagpalit og usa ka unit nga truck, transport vehicle, pag-instalar og CCTV camera, pagpalit sa lima ka unit nga air conditioner, lima ka unit nga refrigerator, pagtukod og playground ug pagpalit sa mga instrumento alang sa banda sa Balulang National High School nga tanan mobalor og P4.6 milyones.