P11.2-B budget sa CDO sa 2024 Social services adunay 30.34% nga pahat

BALOR P11.2 bilyones ang gisugyot ni Mayor Klarex Uy nga budget sa dakbayan sa Cagayan de Oro alang sa umaabot tuig 2024 nga naglangkob sa P10.03 bilyones kapin alang sa General Fund ug P1.16 bilyones kapin alang sa Special Account – Local Economic Enterprises/Utilities.

Kini adunay omento nga P3.4 bilyones gikan sa P7.8 bilyones nga budget karong tuig 2023. Sa gisumete sa mayor nga 2024 Annual Budget ngadto sa konseho sa syudad ubos ni Bise Mayor Bebot Rodriguez, gihatagan og igong pahat ang sektor sa katilingbanong serbisyo nga mokabat sa P3.39 bilyones kapin kon 30.34% nga naglakip sa P1.8 bilyones nga pundo alang sa Health, Nutrition, and Hospital Services ug P1.59 bilyones kapin nga pundo alang sa Social Security, Social Services and Welfare.

Nakakuha sa dakong pahat sa budget sa tuig 2024 ang Economic Services sector nga adunay 44.36% nga pahat kon kapin sa P4.96 bilyones samtang ang General Public Services sector adunay 25.3% kon kapin sa P2.83 bilyones.

Sa iyang budget message, si Mayor Uy namahayag nga sa gisumeteng unang tibouk tuig nga budget sa iyang administrasyon, dako ang iyang paglaum nga mopatigbabaw ang panaghiusa alang sa kaarangan sa kinabuhi sa katawhan sa dakbayan kinsa naghatag sa ilang pagsalig sa mga nangagamhanan.

Niini, dako ang iyang pasalamat sa Konseho sa walay puas nga suporta aron matunol ang mga batakang serbisyo ngadto sa mga nanginahanglan.

Gibutyag sa mayor nga sa executive budget sa 2024, maandam ang katawhan sa pagtubag sa mga hagit nga dala sa panahon nga gigiyahan sa RISE development agenda/formula sa administrasyon nga mao ang R-egional Leadership: Metropolization, Accessibility ug Connectivity; I-nstitutional Development and Participatory Governance; Safety, Security and Human Development, ug E-conomic Recovery.

Alayon niini, ang Konseho sa Syudad ubos ni Bise Mayor Bebot Rodriguez gitakda nga mopahigayon sa 2024 budget deliberations sa umaabot nga mga semana.