P10M dugang ayuda sa panglawas sa mga kabus nga Kagay-anon

MOKABAT sa P10 milyones matag bulan ang gilantaw nga madugang nga pundo alang sa natad sa panglawas sa mga kabus nga Kagay-anon.

Kini human giuyonan sa konseho sa syudad sa sesyon niadtong Lunes nga gidumala ni Bise Mayor Kikang Uy ang ordinansa nga naghatag og katungod ni Mayor Oscar Moreno pagpirma sa Memorandum of Agreement (MoA) tali sa buhatan sa Presidente sa nasud pinaagi ni Executive Secretary Salvador Medialdea alang sa pagpatuman sa programa ubos sa President’s Socio-Civic Projects Fund (SCPF).

Sa maong kasabutan, ang buhatan sa Presidente motunol og P10 milyones matag bulan nga ayuda sa tinguha nga mahatagan sa unang pagtagad ang kaarangan sa panglawas ug kinabuhi sa katawhan.

Niini, ang maong pundo gamiton sa dakbayan dinha sa JR Borja General Hospital aron pagtunol sa gikinahanglang tambal, medisina ug uban pang panginahanglanon sa mga pasyente.

Hinuon, gilatid sa MoA nga dili molabaw sa P50 mil ang magamit sa matag pasyente kinulangan na sa bayaran sa Philhealth ug uban pang assistance ug ang molabaw sa maong kantidad magkinahanglan na sa panugot sa buhatan sa president.

Ang maong P10 milyones matag bulan nga ayuda madawat sa dakbayan hangtod sa Hunyo 30, 2022.

Nunot niini, dako ang pasalamat ni Bise Mayor Kikang Uy sa walay puas nga pag-abag sa nasudnong kagamhanan sa dakbayan sa Cagayan de Oro dinha sa tinguha nga walay mapihig sa gikinahanglan serbisyo ilabina sa natad sa panglawas.