P100M gisugyot dugang pundo sa operasyon sa sanitary landfill

USA sa gipaabot nga uyonan sa konseho sa syudad ubos ni Bise Mayor Kikang Uy mao ang paggahin og dugang pundo alang sa operasyon sa sanitary landfill dinha sa barangay Pagalungan.

Nasukip sa gisumeteng 2022 Executive Budget ni Mayor Oscar Moreno mao ang paggahin og P100 milyones alang sa proyekto pagtukod sa Cell 3 sa sanitary landfill.

Ang maong proyekto ipatuman ubos sa Special Purpose Fund sa kagamhanan sa dakbayan sa natad sa economic services.

Mahinumduman nga ang pagbalhin sa sanitary landfill dinha sa Pagalungan gipatuman ubos sa staggered basis sulod sa pipila ka tuig. Sa tuig 2020, ang dakbayan migahin og P63 milyones kapin alang sa pagtukod og operasyon sa landfill ug karong tuig, mokabat sa P100 milyones usab ang gigahin.

Ang padayong pagpundo sa proyekto makatabang nga matamod sa hingpit sa dakbayan ang gilatid sa balaod dinha sa tukmang paglabay sa mga basura aron maprotektahan ang kinaiyahan.

Ang konseho sa syudad gipaabot nga mopahigayon sa 2022 budget hearing sa umaabot nga semana.