OSAEC padayong gipanday sa mga hintungdang komite sa Konseho

PADAYONG gipanday  sa  mga hintungdang Komite sa Konseho ang sugyot ordinansa nga  nagdili  sa Online Sex Abuse  and Exploitation of Children (OSAEC) dinhi sa syudad.

Sa gipahigayong hiniusang tigom  sa milabyang semana  sa Komite sa Social Services ni Konsehal Joyleen Mercedes L. Balaba, Public Order And Safety  ni Konsehal Romeo V. Calizo ug Sports And Youth Development ni Konsehal Kenneth John D. Sacala, gisugdan  nila  ang pagpanday ug  pagtuki sa maong sugyot ordinansa  sa tinguha nga maprotektahan ang  kabataan sa mga pagpangabuso diha sa  social media nga diin  nagpahamtang og multa alang niadtong makalapas.

Si Atty. Jose Edgardo Uy, Chairman sa CDO Regulatory Compliance Board, mipaambit usab  sa iyang obserbasyon og opinyon sa  mga  kinahanlang idugang sa maong ordinansa.

Niini, nauyunan sa mga hintungdang komite ang pagmugna og Technical Working Group (TWG) nga  gipanguluhan  ni Ms. Jonah A. Domingo sa City Council for the Protection of Children (CCPC) ug gitakda  ang laing panagtigom alang sa maong katuyuan sa  umaabot Marso 1, 2024 aron dugang mahan-ay ang pagpanday niini.