Oro TVI –Puerto Campus matukod

GILANTAW nga mapalapdan pa ang operasyon sa Cagayan de Oro City Technical Vocational Institute (CDOC-TVI).

Kini human ang konseho sa syudad ubos ni Bise Mayor Kikang Uy mihatag og panugot ni Mayor Oscar Moreno pagpirma sa Deed of Donation tali sa Xavier University nga naglangkob sa kapin sa 7,764 metros kwadrado nga luna dinha sa Upper Puerto aron matukuran sa expansion campus sa CDOC-TVI.

Dugang niini, ang konseho mihatag usab sa katungod ni Mayor Moreno pagpirma sa Memorandum of Agreement (MoA) tali sa Xavier University –Ateneo de Cagayan, Department of Education –City Schools Division ug barangay Puerto alang sa panagtambayayong pagtukod og Senior High School Building dinha sa gidonar nga lunang ginapag-iyahan sa Xavier University alang sa CDOC-TVI Puerto Campus.

Dako ang panghinaut ni Bise Mayor Kikang Uy nga pinaagi sa pagtukod og dugang mga tunghaan daghang kabatan-onan ingon man kadtong mga hingkod na ang pangedaron ang mahatagan sa kahigayonan nga mabansay bansay ang kahanas nga magamit sa ilang kapanginabuhian.