Oro Kite Fest ipahigayon sa Hunyo 12, 2023

Ipahigayon sa Hunyo 12, 2023 sa ala una sa hapon dinha sa Isla de Oro ang indigay sa paghimo ug pagpalupad sa tabanog.

Kini ang kasayuran nga nadawat sa konseho sa syudad ubos Bise Mayor Bebot Rodriguez gikan sa City Local Environment and Natural Resources Office (CLENRO).

Ang kalihokan nga pahaum sa kasaulogan sa Global Wind Day gipanguloha’g Sa Limpyo nga Hangin, Magtabanog Ta Uy ug gipasiugdahan sa CLENRO.

Niini, gidasig ang mga bata nga nag-edad og 8 ngadto sa 15 anyos kuyog sa ilang mga ginikanan o’ guardian sa pagsalmot sa kalihokan sa Hunyo 12, 2023 sa alas 1 sa hapon dinha sa riverside sa Isla de Oro.

Kadtong mga mahiligon sa pagpalupad sa tabanog mahimong magparehistro pinaagi sa pre-registration link: https://ee.KoboToolbox.org/ZvKq0MrN. Gawas sa pre-registration link, gidasig usab kadtong mga magparehistro sa indigay sa pagdala og usa ka kilong recyclable waste materials ug ang tabanog kinahanglang ginama gikan sa recyclable material.

Ang makakuha sa unang dapit adunay ganti balor P5 mil, P3 mil sa ikaduha ug P2 mil sa ikatulong dapit.