Oro Human Milk Bank, Lactation Support Center gimugna

DUGANG kaarangan sa mga inahan ug kabataan ang gipaabot nga matagamtaman dinhi sa dakbayan sa Cagayan de Oro.

Kini human paborableng giuyonan sa konseho sa syudad ubos ni Bise Mayor Kikang Uy ang ordinansa nga nagmugna sa Human Milk Bank and Lactation Support Center (HMB-LSC) dinha sa mga hospital nga gipanag-iyahan sa kagamhanan sa dakbayan.

Si Konsehal Edna Dahino, chairman sa komite sa women and family relations, ug nangamahan sa ordinansa, mipasabot nga ang maong lakang nunot sa tinguha sa dakbayan nga mapatuman sa hingpit ang katungod sa kababaehan ug kabataan sa natad sa panglawas.

Ang pagpasuso maoy nakitang labing maayong paagi aron matunol ngadto sa mga nahimugsong bata ang gikinahanglang nutrisyon, pasabot ni Dahino.

Siya midugang nga ang pagmugna sa HMB-LSC maghatag sa igong supply sa gatas sa inahan nga matunol ngadto sa mga nahimugsong kabataan ilabina kadtong mga adunay kondisyon o’ kakulangon sa nutrisyon.

Kini, gawas pa nga maabagan usab ang mga inahan nga makab-ot ang hingpit nga mga tumong sa pagpasuso.

Ang ordinansa nga gipalabang sa konseho naggahin og kapin sa P8 milyones gikan sa pundo sa JR Borja General Hospital aron magamit sa operasyon sa sentro.

Si Konsehal Girlie Balaba, vice chair sa komite sa women and family relations, maoy co-author sa ordinansa.

Ang maong lakang gipaluyohan usab nila ni Konsehal Malou Gaane, chairman sa komite sa panglawas, inubanan nila ni Konsehal Reuben Daba ug Suzette Magtajas-Daba, Konsehal Ian Mark Nacaya, chairman sa komite sa pamalaod, uban ni Konsehal Edgar Cabanlas.