Oro crematorium subhan sa Mayo 4

SUBHAN na sa Mayo 4, 2022 ang crematorium nga gipanag-iyahan sa dakbayan sa Cagayan de Oro dinha sa City Memorial Park kanhi Bolonsiri Public Cemetery sa Bolonsiri, Barangay Camaman-an.

Kini ang kasayuran nga nadawat sa buhatan ni Bise Mayor Kikang Uy gikan ni acting City Administrator Teddy Sabugaa human giluwatan ang Memorandum nga nagpahibalo sa pagpahigayon sa programa pahaum sa kalihokan.

Mahinumduman nga ang crematorium kabahin sa P367 milyones nga budget sa redevelopment sa maong sam-ang.

Niini, dili lang lubnganan ang gitanyag sa dakbayan kun dili lakip na ang pag-embalsamo ug usab ang pagtukod sa 12 ka mga luna nga mahimong magamit sa paghaya sa patay.

Dako ang panghinaut ni Bise Mayor Kikang Uy nga ang kalamboan sa City Memorial Park makatabang sa katawhan ilabina sa mga nanginahanglan.