Ordinansa sa Nazareth tukion sa komite sa barangay affairs

GILANTAW nga kaharuhay sa serbisyo ang matagamtaman sa katawhan sa Barangay Nazareth, ning syudad.  

Kini human nadawat sa Konseho sa Syudad ubos ni Bise Mayor Bebot Rodriguez ang Ordinance No. 04 series of 2025 kon “Sectoral Helpdesk Ordinance” nga gipalabang sa Konseho sa Barangay Nazareth.

Tumong sa maong ordinansa ang pagmugna og sectoral helpdesk nga naglangkob sa lima ka sektor aron moakomodar sa mga tawong adunay kakulangon sa panglawas, (PWDs), lesbian, gay, bisexual, transgender, queer, intersex, asexual (LGBTQIA+), mga hamtong, solo parents, kasambahays, mga kababayen-an ug mga biktima sa pang-abuso batok sa kababayen-an ug kabataan (VAWC).

Kini aron sa pagsiguro nga mahatag ang haruhay nga  serbisyo ngadto sa mga sektor ug pagpalig-on sa kapasidad sa barangay sa pagtubag sa mga panginahanglanon sa maong mga grupo.

Ang maong ordinansa giduso ni Bise Mayor Rodriguez ngadto sa komite sa barangay affairs ubos ni Konsehal Yan Lam Lim alang sa dugang pagtuon niini. (RNQuiblat/SP)